Allerede nede i trappegangen kjende du lukta av heimelaga mat - frå kjøkkenet til Besta. Det dufta så godt av alt frå sveler, kringler, rømmegraut, flatbrød, nordlandskaker og dei beste middager du kunne tenke deg. For meg som var på Fure kvar sommar, kan eg huske kva stas det var å komme opp til Besta. Og den minste lukt av nybakst kan ennå raskt sette meg fleire tiår tilbake...

Ho dekka bordet så fint med duk, nyplukka blomstrar og fint kaffeservise kvar gong vi kom dit. Og vi ungane talte rosiner i melkesuppa, det viktige var kven som hadde fått flest.. Og suppa det var alltid for varmt, så det fekk stå i vinduet og kjøle seg litt, fast rutine. Ja mange gleder hadde vi i kjøkkenet til Besta. Gjevt for meg å tenke tilbake på, og ekstra stas er det å sitte med oppskriftsboka til Besta i hendene. Den vil eg i framtida dele med alle, den vart påbegynt då ho gjekk i husmorskulen i Kroken i Luster, og er oppbygd på menyar for kvar dag frå eine permsida, frå andre permsida står det om kjøkkenreglar og oppskrifter ho sjølv har brukt gjennom heile livet. Turen  inn til Kroken tok ei veke på den tida er eg blitt fortalt!  Boka har eg gått gjennom og prøvd å få oppskriftene inn på dataen. Men det er ein del reinskrivings arbeid igjen - og mange ord som må tydas med hjelp frå andre. Fleire av oppskriftene her er gjengitt med ordlyden som dei står skrevne med.

Solbærsylte
1 kg solbær
ca 8 dl vatn
2 kg sukker
Kok bæra i 5 min. Tilsett sukkeret, og rør i sylta ein halv time. Ha den på glas og la den stå til den er kald. Legg på matpapir med eddik på og skru på loket.

Vasskringle
Almindeleg gjærdeig, men mjølka skal ikkje varmast. Arbeider deigen godt, står i stovetemperatur til heving 1 time. Eltar den ut til kringle, legg dei på mjølna plate ½ time. Legg dei yver i gryte med kokande vatn. Når dei flyt op, lægg me dei yver på smurt plate og steiker dei.

Sveler 1, stod i ei oppskriftsbok.
  1 liter kefir
  1/2 liter lettrømme
  1 ts natron (skal rørast ut i kefir)
  Mjøl til passeleg tjukk røre.
  Steikast på takke.
(Denne blir litt syrleg i smaken)

"Bakste-skeia til Besta, denne brukte ho til
å jevne utover røra på takka med.
Derfor er også skeia flatsliten under."

Sveler 2, liknar mest på den som Besta brukte.
2 egg
2 kopper sukker, pisk lett saman
2 ts natron
1 liter kefir, rør natron oppi kefir og tilsett
1 ts hjortesalt
1 knivodd vaniljesukker
Mjøl tilsettes til slutt. Ikkje fullt så tjukk som vaffelrøre. Blir dei for tjukke blir det lappar. Lagast dobbelt så store som lappar. Serverast med sukker, rømme, smør, syltetøy eller brunost til. Server svelene halv lunkne.

Ripssylte og Stikkelsbærsylte
1 kg bær
½ l vatn
2 kg sukker
Kok bær og sukker 10 min, tak dei av varmen, ha i sukkeret og rør ¾ time. Litt mindre vatn hvis bæra er overmodne.

Sotsuppe
4 l vatn
120 gr sagogryn
150 gr sviske
ca 2 dl saft
600 gr rosiner
Kok rosiner og svisker møyre i det vatnet dei er bløytte i. Sagogryn vaskast i kaldt vatn og dryssast på når vatnet kokar opp. La koke ca 20 min til dei vert klåre. Ha i rosinene og sviskene. Sukker etter smak og saft.

Flesk og potetstuing
700 gr flesk eller kjøt
1 ½ l oppskåret kålrot
3 l oppskårne poteter
1 løk
1 ½ ts heil pepper
ca ½ l vatn
Salt
Salt kjøtt eller flesk vatnast ut natta over. Skjerast i strimler eller terningar og kokas til det er møyrt. Grønnsakene som er oppskårne skal og has i. Forvell løken og skjær den opp.

Eiergrynpudding
3 l mjølk
240 gr eiergryn
50 gr smør
ca 75 gr sukker
½ ts salt
Kok opp melk, dryss på gryn og kok til dei er gjennomsiktige. Ha i sukker, salt og smør. Serveres kald i kompottskåler med raud saus til.

Raud saus
1 ½ l vatn og saft
Sukker
30 gr potetmjøl

Myssmørsaus
50 gr smør
50 gr mjøl
¼ l mjølk
100 gr myssmør
ca 25 gr sukker
Salt
Smelt smøret, rør i mjølet, spe med kokande mjølk. Myssmøret røres ut i skål med litt mjølk i. Har ein ikkje det kan ein bruke mysost, men då må ein ha litt eddik i. Sukker og salt til slutt.

Raspeballar
3 kg poteter
ca 1 kg grynmjøl
2 ½ mts salt
Vatn
Salt
Vask og skrell potetene, før du mel dei i kjøtkvern. Rør grynmjøl i massen til den er passe tjukk. Lag småbollar med ei treskei, som du har over i kokande salta vatn. Skal koke i ¾ time – 1 time. Serverast med myssmørsaus.

Potetsuppe
½ kg rå poteter
4 l vatn og kraft
60 gr fett
80 gr mjøl
300 gr gulerøtter
Pepar
Salt
Kok rensa og oppskorne poteter møyre i salt vatn, saman med grøn kvast. Press dei i hårsikt. Smelt fett og rør i mjøl. Spe med kokande kraft. Ha i potetmassen og purre oppskore i skiver. Kok nokre minutt. Gulerøttene kokast heile, skjer dei opp med rifla rotkniv og ha i suppa. Smak til med pepar og salt.

Fiskesuppe
100 gr smør
130 gr mjøl
3 ¾ l fiskekraft
5 dl søt mjølk
1 stor toppa mts finhakka graslauk
4 dl sur fløyte
500 gr gulerøtter
Sylta potulak
Vask og rens grønsakene. Kok dei heile. Skjer dei opp med rifla rotkniv. Smelt smøret, rør i mjøl, spe med kokande fiskekraft. Ha i kokande mjølk, fløyten og til slutt alle grønsakene. Serverast med sylta portulak.

Eplekompott
1 kg eple
2 dl vatn
200 gr sukker
¼ l tjukk fløyte
Vask og rens epla og skjer i båtar. Legg i kaldt vatn etter kvart. Kok skrellet fyrst, gnid det gjennom hårsigt. Stykka kokar du møyre i same vatnet som skrellet. Når det er avkjølt, legg me lagvis i kompottskål, fyrst eplemasse, so eit lag stivpiska fløyte. Til pynt kan me bruke eplestykke, sviske eller gele. Istaden for eplekompott kan me bruke sviskekompott.

Denne raspa vart brukt av Besta til å raspe poteter til raspeballane (komlene) ho laga, før kverna kom til gards.

 

Trondheimsrose
500 gr kveitemjøl
50 gr sukker
1 knivsodd salt
50 gr smør
25 gr gjær
ca 2,5 dl mjølk
1 egg
Varm mjølka og rør gjæren i. Sikt mjølet og smuldre i smøret. Ha i salt og sukker. Ha i mjølk og gjærblanding og egg. Arbeid deigen til den er jevn. Hevast til dobbel størrelse.

Fyll
2 store epler
1 ss smør
2 ss sukker
2 ss vatn
100 gr rosiner
50 gr hakka mandler
Rens og del eplene i skiver. Kok dei med smør, sukker og vatn, til dei er møyre. Tilsett rosiner og mandler og la det heile avkjølast.

Deigen kjevlast ut i lengde. Fordel fyllet på midten og kantane penslast med vatn. Deigen rullast saman og legges som krans på plata. Skjer hakk i.

Glasur: 100 gr melis, 1 ss vatn, 3 dråper rom essens.

Mjukebrød (fiskebrød?)
Denne oppskrifta er henta inn frå Else Fure, den blei brukt av Ragnhild, søstera til Besta. Truleg kjem oppskrifta frå Jølster.

Kok og mos ca 4 poteter
Kok ein tjukk graut av semulje og 1 liter søtmelk. Viktig at den er metta av gryna. Skal bli stabbende tjukk.
Når det er passelig kaldt til å handtere, kna i potetene og mjøl til det er passelig fast. Ha i 1/2 ts hjortesalt, blanda i mjøl før du tek til å kna i mjøl. Det går en del mjøl med her. Bruk voksduk til å bake ut på. Steikes på 2-3 (4 hakk på panna) 1800w. Kort steiketid - begge sider.
 

Lefser (til godt 20 lefser)
1 liter kefir
1 boks lettrømme
1 boks sæterrømme
Visp rømmen inn i kefiren
Ha i sirup
4 ts hjortesalt
1 1/4 ts natronsalt
Bland hevelsen (hj.salt og natron) i mjølet og løft inn i mjølet til det er bakefast. la deigen kvile ei stund. Lag emna før du til til å bake. Dekk lefsene med klede etter kvart. Pakk dei inn til dei er kalde, då slepp du dynke dei før du smør dei. Smør dei med det same, når dei er passelig kalde.
Lage emne: hold med høgre hand og vri kanten rund. Bank deigen litt ned og begynn med lett kjevling.

Pannekaker
2 egg
2 dl fløyte
2 dl vatn eller 4 dl melk
2 dl mel
knapt 1 ts salt
2 ss smør
Bruker vi bare melk, ha da i 1 ts bakepulver.

Jødekaker (1992)
1 egg
125 gr farin
175 gr margarin
ca 250 gr kveitemjøl
1/2 tsk hjortetakksalt
eggekvite til å pensle dei med
30 gr mandlar (ca 15 stk)
30 gr perlesukker eller rafinade
Steiketemperatur 180 grader. Steiketid ca 8-10 min.
Pisk eggedosis av egg og sukker. Sikt saman mjøl og hevingspulver og bland det i eggedosisen vekselvis med utvaska maragrin. Kjevle deigen ut tynn og stikk ut med glas. Pensle dei med eggekvite. Strø på sukker og strimlar av mandlar (skolda). Legg dei på smurt plate, steik dei lysegule.

Bilder frå Husmorskulen som er funnet i albumet til Besta